يوميات حماتي
أبدا الجيش قالك أيه
إتصرف... أنا أخد الطبق ده وعند ماما بطتين عالسطح صحه وهنا على قلبهم أنا قولت كده ونيتى مكنتش صافيه... مكنتش ناويه أرجع طبق الأكروبال تانى... يظهر حماتى فهمتنى فقالتلى
_لأ يا ناصحه فى هنا كيس تانى ممكن نحطه هو كمان.
حماتى أروبه
المهم بعد محاولات وعمليات جراحيه لمداوة جراح البسبوسه أهى بقت شبه خليط البسبوسه حطيت الخليط فى الصنيه الالمونيوم...
_فين الزبيب
معنديش
_فين جوز الهند
مش بحبها
_فين السوادنى
البت جنه بنت بنتى كلت آخرحبه منه إمبارح.
_طب فين الكاچو والفزدق والبندق و عين الجمل.
ما أهو قدامك الطبق اللى كان فيه آخر حبه بقيتهم فى إيدك أهم من وقت ما دخلتى وإنت إيدك شغاله فيهم وخلصتيهم أكل.
فكرتينى الواد أحمد إبن بنتى قالى نفسى فى رز بلبن يا تيتا يلا إخلصى حطى البسوسه عالنار وبعدها أنا عندى شوية رز بايتين من أول إمبارح وفى لبن فى فريزر التلاجه طلعى كيس لبن ونعمل بالمره رز بلبن.
_حاضر بس هحط البسبوسه فين البسبوسه لازم تتعمل فى فرن البوتاجاز وبوتاجازك مسطح مالوش فرن.
_وأنى إيش درانى.
فكرى شويه بعقلك بدل بوقك اللى مش مبطل أكل مكسرات بقتى أخت الفيل التوأم.
انا طنشت ووقفت بس حسيت بعدها بحد رمى فوشى لوح تلج.
_خدى الصنيه وإطلعى الشقه اللى فوق فيها بوتاجاز بفرن شغليه وحطى الصنيه فيه.
بوتاجاز أيه اللى فى الشقه اللى فوق هو فى حد عايش فى الشقه اللى فوق دى مقفوله عالعفش من بداية القرن الجديد.
فرن أيه يا عمتى البوتاجاز لسه مطلعش من كرتونته وقرب يصدى والباروما هتشتغل فيه قبل ما يشتغل غير كمان مفيش فيه منظم للانبوبه.
فكرت حماتى صاحبه الافكار الالمعيه المذهله وقالت
فكره عظيمه يا عمتى الجيش قالك أيه
_إتصرف
بفرن ساعه بالكتير وأرجعلك بالصنيه جاهزه بس هاخد الطبق والبوله دى معايا مټخافيش أنا هغسلهم والله.
بصتلى حماتى بصه مش ناسيها
والله يا عمتى أخواتى وأمى لو عرفوا أنى حطيت إيدى فى البسبوسه دى مستحيل ياكلوها حفاظا على القولون بتاعهم.
_لاء برضو هنعملها على عين البوتاجاز.
بشوقك ده كان مجرد إقتراح.
المهم حطيت صنية البسبوسه على عين البوتاجاز
قولت لها
هحضر الشربات بتاعها بقى... فين السكر
_لاء بلاش سكر فى التلاجه عسل نحل.
طب هسخن عسل النحل ده إزاى دلوقتي...
